كيك بدون زيت و بدون خميرة رائع

كيك بدون زيت و بدون خميرة رائع
بعد المرات كانبغيو نصاوبو شي كيكة للكوتي وماكانلقاوش الخميرة كان انيليو كولشي من هنا للقدام تاحاجة ماتمنعكم تتمتعو بكوتي زوين وكيكة ساهلة ماهلة ودغيا توجد 

مقادير كيك بدون زيت و بدون خميرة رائع
220 غرام سكر سنيدة
5 بيضات
150غرام دقيق
4 معالق كبار حليب
عصير حامضة وقشورها محكوكين



اول حاجة كانفرقو الصفر والبيض د البيض


الصفر د البيض نزيدو عليه سنيدة ونطربوه تايولي الخليط بحال الكريم نزيدو ليه الحليب وعصير حامضة وقشورها محكوكين مع التخلاط تايتجانسو ونضيفو الدقيق
البيض د البيض نزيد عليه قريصة د الملح ونطربو تايولي بحال الثلج


صافي ونجمعو الخليطين بمعلقة خشبية نحركو بشوية ومن الفوق للتحت تايندامجو مع بعضهم


نديرهم في المول من الاحسن يكون المول المستطيل وندخلهم يطيبو في الفران لي يكون ديجا مسخن على 150 درجة مدة ساعة


مني طابت الكيكة سقيتها بصوص الحامض
5 معالق كبار عصير الليمون و5 معالق كبار عصير الحامض
قشرة حامضة
5 معالق سنيدة
3 معالق كبار نيدو
معلقة صغيرة د النشا مايزينا
هاد المقادير كاملا كانديرها في كاسرونة فوق العافيا ونبقا نحرك تاتبدا تعقاد ونطفي عليها تاتبرد شويا عاد نسقي بيها الكيك



شوفو كيف كاتجي مقطنة من الداخل



بالصحة والراحة نتمنا الوصفة تعجبكم وتجربوها

كيك بدون زيت و بدون خميرة رائع
 
Top
//