بمناسبة شهر رمضان الكريم كنقدم لكم هاد المقروط كيجي لذيذ و ساهل و اقتصادي فالمستوى كنتمنى تجربوه وينال اعجابكم
المقادير
زلافة سميدة غليضة
2 زلايف سميدة رقيقة
شوي لملح
زلافة مخلطة زيت وزبدة دالعبار
م ص قرفة
م ك سنيدة
للحشو
التمر مبخر(استعملت الجاهز)
م ك زبدة
م ك زهر
م ص قرفة
راس م ص قرنفل(ماعنديش مادرتوش)
الطريقة
كنخلطو النواشف كاملة اي السميدات بجوج ولملح وسنيدة ولقرفة ونبسبسوهم مزيان بالزيت والزبدة حتى يشربو ونغطيوه فبواطة حتال الغد
الغد نبداو بالتمر هوالاول نوجدوه انا كان عندي فالتلاجة وبخرتو شوي باش يدفى ويرطاب
وزدت عليه الزبدة ولقرفة والزهر وعجنتو مزيان
وعملت حرابل رقاق شوي
عاد جمعت السميدة بشوي الما بارد حتى شربات مزيان وتجمعات ولات رطبة
نقسموها كويرات ونخليوهم مغطين فلبواطة باش ماينشفوش ونخدمو بوحدة بوحدة
نعملو حربال طويل ونكرصوه ونعاودو نحفرو على الطول بصباعنا ونحطو التمر
ونسدو على التمر بلعجينة ونعاودو نحربلوها
نرشمو بلمرشم الخاص د المقروط ونقطعوه
بيني وبينكم ما عجباتنيش الزواقة دلمرشم ماكتجيش باينة وانا نقلب الزواق غي بلموس
ونغطيوه على مابدينا نقليو باش ماينشفش
هنا طفات ليا لاكام ويني را القليان معروف ههه
ونطفيو مباشرة فالعسل منسم بالزهر والمسكة ونخليوه شوي مغمس باش يشرب
ونعملوه يتسقطر فشبيكة
هاهو وجد بالصحة والراحة
